Imazhi piktoresk i dëborës në Sheshin e Kuq në Moskë, si duket, së shpejti do t’i mungojë Moskës krejtësisht. Kryetari i këtij qytetit, Yuri Luzhkov, dëshiron të zhdukë çdo dëborë nga kryeqyteti rus. „Pse mos ta mbajmë dëborën jashtë kufijve të qytetit tonë?“, citonin të enjten disa gazeta ditore kryetarin e Moskës, i cili njihet si tifoz i madh i ndikimit të mikro-klimës. Saherë që në Moskë të paraqiten re dëbore, do të duhet thjeshtë të dëbohen.

“Për fushat rreth qytetit do të thoshte më shumë ujë dhe me këtë një korrje më e begatshme – ndërsa për ne, më pak borë,” tha Luzhkov për idenë e tij. Qyteti do të kursente jashtzakonisht shumë. Së fundi, dëbimi i dëborës kushton qytetit 3 herë më pak sesa pastrimi i rrugëve nga ajo, shtoi ai.

Tashmë e ca kohë, në Moskë e parasegjithash gjatë festave të mëdha, ndikohet moti në mënyrë artificiale duke siguruar një qiell të pastërt pa re për këtë qëllim përdoren aeroplanë dhe lëndë kimike, përkujtoi kryetari.